Украина президенти Владимир Зеленский Россиянинг Донбасс ҳудудини тўлиқ эгаллаш эҳтимоли ҳақида кескин баёнот берди. Унинг таъкидлашича, агар Россия шарқий Украинани тўлиқ босиб олишга уринадиган бўлса, бу камида икки йил вақт ва юз минглаб қурбонлар эвазига амалга ошиши мумкин.
Зеленский бу фикрни Франциянинг France 2 телеканалига берган интервьюсида билдириб, Россия Донбассни эгаллаш учун тахминан яна 800 минг аскар йўқотиши мумкинлигини айтди. Унга кўра, Россия армияси ҳудуднинг ҳар бир метри учун катта йўқотишлар бермоқда.
Украина раҳбари Россия Украинадан Донбасс ҳудудларини тўлиқ тарк этишни талаб қилаётганини ҳам қайд этди. Шу билан бирга, фронт чизиғини музлатиш ёки мавжуд позицияларни сақлаб қолиш Украинадан муҳим ён бериш бўлишини таъкидлади.
Зеленский урушни тугатиш устувор вазифа эканини айтиб, халқаро ҳамкорлар, хусусан АҚШ билан ҳамкорлик муҳимлигини билдирди. Интервью Россия, Украина ва АҚШ ўртасида музокаралар давом этаётган бир пайтда эълон қилинди.