Россия компаниялари 2023 йилда Хитойдан Россия армияси учун зарур бўлган юзлаб миллион долларлик икки томонлама мақсадли товарларни сотиб олди, деб ёзади Politico божхона маълумотларига таяниб.
Қайд этилишича, йил бошидан бери Хитой Россияга 100 миллион долларлик фуқаролик учувчисиз учоқлар ва зирҳ учун 225 миллион доллардан ортиқ кевлар етказиб берган.
Бундан ташқари, Россия компаниялари Хитойдан тайёр тана зирҳлари ва дубулғаларини, шунингдек, термал нишонларни сотиб олади. Журналистларнинг аниқлашича, уруш бошлангандан бери тахминан 11 миллион долларлик камида 220 та шундай жўнатиш амалга оширилган.
Нашрнинг қайд этишича, кўпинча икки мақсадли товарларни харид қилиш Россиянинг «fly-bynight» компаниялари томонидан амалга оширилади. Аксарият ҳолларда улар божхона ҳужжатларида сотиб олинган товарларнинг бошқа номларини кўрсатадилар. Масалан, Ростовнинг «Positron» компанияси 2022 йилнинг ноябрь ва декабрь ойларида қиймати 60 миллион доллардан ортиқ бўлган дубулғаларни «турли кулолчилик буюмлари» сифатида харид қилган.
Россиянинг Украинага кенг кўламли бостириб кириши бошланганидан сўнг, Ғарб давлатлари Россияга қарши кўплаб санкциялар киритдилар. Чекловларнинг бир қисми Россияга ҳарбий мақсадларда ишлатилиши мумкин бўлган технологияларни этказиб беришни тўхтатиш учун мўлжалланган. Шунга қарамай, киритилган барча чекловларга қарамай, Россия бир қатор мамлакатлардаги компаниялар орқали керакли бутловчи қисмларни сотиб олмоқда.