Ижтимоий тармоқда Самарқанд шаҳрида ИИБ ходими аёл кишига нисбатан куч ишлатгани акс этган видео тарқалди. Ҳолат юзасидан вилоят ИИБ ахборот хизмати раҳбари Жаҳонгир Сагдуллаев маълумот берди.
Қайд этилишича, ҳолат 9 июнь куни жамоат тартибини сақлаш, фуқароларнинг хавфсизлигини таъминлаш мақсадида тунги хизматга жалб қилинган профилактика инспектори С.Эшонқулов билан юз берган. У соат 22:00 ларда Самарқанд шаҳар Даҳбет кўчасидаги автомобиль йўлининг қатнов қисмида фуқаролар жанжал қилаётганлигини кўриб, уларни 6-сон ИИБга олиб борган. Уларнинг содир этган қилмишини расмийлаштириш давомида профилактика инспектори ва ушбу шахслар ўртасида келишмовчилик юзага келган.
Жараёнда профилактика инспектори икки нафар фуқароларга нисбатан амалдаги қонунчиликка зид равишда жисмоний куч ишлатган. Ҳолат юзасидан хизмат текшируви ўтказилиб, профилактика инспектори С.Эшонқулов ички ишлар органлари сафидан бўшатилган.
Тўпланган ҳужжатлар иштирокчиларнинг ҳаракатларига ҳуқуқий баҳо бериш учун прокуратура органларига юборилган.