Ijtimoiy tarmoqda Samarqand shahrida IIB xodimi ayol kishiga nisbatan kuch ishlatgani aks etgan video tarqaldi. Holat yuzasidan viloyat IIB axborot xizmati rahbari Jahongir Sagdullayev maʼlumot berdi.
Qayd etilishicha, holat 9-iyun kuni jamoat tartibini saqlash, fuqarolarning xavfsizligini taʼminlash maqsadida tungi xizmatga jalb qilingan profilaktika inspektori S.Eshonqulov bilan yuz bergan. U soat 22:00 larda Samarqand shahar Dahbet ko‘chasidagi avtomobil yo‘lining qatnov qismida fuqarolar janjal qilayotganligini ko‘rib, ularni 6-son IIBga olib borgan. Ularning sodir etgan qilmishini rasmiylashtirish davomida profilaktika inspektori va ushbu shaxslar o‘rtasida kelishmovchilik yuzaga kelgan.
Jarayonda profilaktika inspektori ikki nafar fuqarolarga nisbatan amaldagi qonunchilikka zid ravishda jismoniy kuch ishlatgan. Holat yuzasidan xizmat tekshiruvi o‘tkazilib, profilaktika inspektori S.Eshonqulov ichki ishlar organlari safidan bo‘shatilgan.
To‘plangan hujjatlar ishtirokchilarning harakatlariga huquqiy baho berish uchun prokuratura organlariga yuborilgan.