Самарқанд вилояти Ургут туманида “Lacetti” автомобилига қўлбола усулда тайёрланган “01 777 PPX” давлат рақамини тақиб ҳаракатланган шахс маъмурий жавобгарликка тортилди. Суд қарорига кўра, у ярим соат давомида ушбу қалбаки авторақам билан ҳаракатланган.
Аниқланишича, Ҳ.С. 2025 йил 4 сентябрь куни автомашина ювиш шохобчасига бориш мақсадида қалбаки рақамни ўрнатган. ЙҲХБ ходимлари текшируви давомида унинг аслида “30 X 877 OB” давлат рақами эгаси экани маълум бўлган. Фуқаро бундай ишни фақат расмга тушиш учун қилганини билдирган.
Суд Ҳ.С.ни ЖКнинг 227-1-моддаси 1-қисми билан айбли деб топиб, БҲМнинг 50 баравари — 20 миллион 600 минг сўм жарима тайинлади. Шунингдек, 1 жуфт қалбаки авторақам йўқ қилиниши белгиланди. Қайд этилишича, 2025 йил 25 декабрь ҳолатига кўра, “01 777 PPX” рақами ҳеч кимга расмийлаштирилмаган.