Саудия Арабистонида мамлакатнинг энг кекса фуқароси сифатида танилган Носир ал-Вадоий вафот этди. Унинг оиласи марҳумнинг 142 ёшда бўлганини маълум қилган. Бу ҳақда Саудия Арабистонининг Оказ нашри хабар берди.
Қариндошларининг айтишича, Носир ал-Вадоий 1884 йилда Заҳрон ал-Жануб ҳудудида, Арабистон ярим оролининг турли минтақалари ягона давлатга — Саудия Арабистони Қироллигига бирлаштирилишидан аввал туғилган. У қироллик асосчиси Абдулазиз ибн Сауддан тортиб ҳозирги ҳукмдор Қирол Салмон давригача бўлган бир неча монархлар замонига гувоҳ бўлган.
Оиласи маълумотларига кўра, ал-Вадоий мулойим хулқи, жасорати ва жисмоний қуввати билан танилган. У умрининг сўнгги йилларигача ҳам ўз жамоасининг ижтимоий ҳаётида фаол иштирок этиб келган. Яқинларининг таъкидлашича, унинг узоқ умр кўришига соддалиги билан ажралиб турадиган овқатланиш тартиби сабаб бўлган. Хусусан, у кам миқдорда овқат истеъмол қилган, асосан унмаган буғдой, асал, майиз ва сариёғдан фойдаланган ҳамда айрон ичган.
Марҳумнинг жаноза намози Даҳрон вилоятидаги Ас-Суқ масжидида ўқилган бўлиб, маросимда 7 мингдан ортиқ киши иштирок этган. Шундан сўнг Носир ал-Вадоий туғилган қишлоғи — Ар-Рашидда дафн этилган.
Оиласи унинг чуқур диндор бўлганини, умр давомида 40 мартадан ортиқ Ҳаж зиёратини адо этганини ҳам маълум қилди. Нашр маълумотларига кўра, Носир ал-Вадоий уч марта турмуш қурган бўлиб, ундан жами 134 нафар фарзанд ва набира қолган.
Ўлим сабаби узоқ давом этган касаллик сифатида қайд этилган.