Хитой Халқ Республикаси раиси Си Цзиньпин чоршанба куни Россия президенти Владимир Путин ва АҚШ президенти Дональд Трамп билан кетма-кет телефон орқали мулоқот қилди, деб хабар берди Хитой давлат ОАВлари.
Xinhua агентлигига кўра, Си Цзиньпин Россия раҳбари Владимир Путин билан ўтказилган видеомулоқот тугагач, бир неча соат ўтиб АҚШ президенти Дональд Трамп билан телефон орқали суҳбатлашган. Пекин ҳозирча Си ва Трамп ўртасидаги суҳбат тафсилотларини ошкор қилмаган. Бу 2026 йилда Си Цзиньпиннинг Путин ва Трамп билан илк телефон мулоқотлари бўлди.
Мазкур суҳбатлар АҚШ ва Эрон ўртасидаги кескинлик кучайган, шунингдек, Украинадаги урушни якунлаш бўйича дипломатик саъй-ҳаракатлар фаоллашган бир пайтда ўтказилди. Худди шу куни Баҳрейнда (БАА) Киев, Москва ва Вашингтон иштирокидаги уч томонлама музокараларнинг иккинчи босқичи бошланди.
Путин билан видеомулоқот чоғида Си Цзиньпин Хитой ва Россиянинг йирик давлатлар ҳамда БМТ Хавфсизлик кенгашининг доимий аъзолари сифатидаги масъулиятига эътибор қаратди. У икки давлат адолат ва тенгликни қатъий ҳимоя қилиш, Иккинчи жаҳон уруши натижаларини сақлаб қолиш, БМТ марказидаги халқаро тизим ва халқаро ҳуқуқ меъёрларини қўллаб-қувватлаш ҳамда глобал стратегик барқарорликни биргаликда таъминлаши зарурлигини таъкидлади.
Сўнгги йилларда Хитой ва Россия ўртасидаги алоқалар сезиларли даражада мустаҳкамланди, ўтган йили ўзаро савдо ҳажми қарийб 200 миллиард долларға етди. Шу билан бирга, Пекин ва Вашингтон ўртасидаги муносабатлар ҳам ўтган йил охирида Жанубий Кореяда Си Цзиньпин ва Дональд Трамп учрашувидан сўнг нисбатан барқарорлашгани қайд этилмоқда.