Ижтимоий тармоқларда “Ҳудудий электр тармоқлари” АЖ Сирдарё ҳудудий филиали ходими вафот этгани ҳақидаги хабарлар тарқалиши ортидан корхона расмий муносабат билдирди. Мазкур хабарларга аниқлик киритиш мақсадида жамоатчиликка расмий маълумот берди.
Қайд этилишича, 2025 йил 29 декабрь куни Сирдарё тумани Адолат маҳалласи ҳудудида содир бўлган бахтсиз ҳодиса оқибатида вафот этган фуқаро “Ҳудудий электр тармоқлари” АЖ Сирдарё ҳудудий филиали тизимида ишламаган ва корхона ходими ҳисобланмайди.
Дастлабки ўрганишлар натижаларига кўра, ҳодиса хавфсизлик техникаси қоидаларига риоя қилинмагани ҳамда яроқсиз ҳимоя воситаларидан фойдаланилгани сабабли юзага келган. Мазкур ҳолат бўйича ҳозирда тегишли мутасадди ташкилотлар томонидан белгиланган тартибда суриштирув ишлари олиб борилмоқда.
Шу муносабат билан, “Ҳудудий электр тармоқлари” АЖ Сирдарё ҳудудий филиали матбуот хизмати фуқароларни фақат расмий манбаларга таянишга, текширилмаган ва асоссиз маълумотларни тарқатмасликка чақирди.