Бош прокуратура ҳузуридаги Департаментнинг Учтепа туман бўлими томонидан ўтказилган терговга қадар текширувда, фуқаро Х.М. ўз уйида яширин ишлаб чиқариш цехи ташкил қилиб, “Rolton” бренди остида истеъмолчиларнинг соғлиғи хавфсизлиги талабларига жавоб бермайдиган маҳсулотни қўлбола усулда ишлаб чиқариб, қадоқлаб сотиш учун тайёрлаб қўйганлиги аниқланди. Мазкур хонадондан 464 дона қадоқланган “Rolton”, 68 килограмм сариқ ва 7,49 килограмм қизил рангли кукунлар ва бошқа маҳсулотлар ашёвий далил сифатида олинган.
Шунингдек, “Rolton” маҳсулоти ҳуқуқий эгаси “M.F.” компаниясининг маълумотига кўра, фуқаро Х.М. томонидан ишлаб чиқарилган “Rolton” маҳсулоти қалбаки экани, олинган кукунлар компания томонидан ишлаб чиқарилмагани, қадоқланган пакетлардаги код рақамлари ҳам қалбакилиги аниқланган.
Мазкур ҳолат юзасидан Жиноят кодексининг 149-моддаси (муаллифлик ёки ихтирочилик ҳуқуқларини бузиш), 186-моддаси (фирибгарлик) ва 228-моддаси (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) билан жиноят иши қўзғатилган.
Ҳозирда ушбу ҳолат юзасидан тергов ҳаракатлари ўтказилмоқда.