Кадастр агентлиги ижтимоий тармоқларда тарқалган “Тадбиркор қурилишдаги коррупция ҳақида” номли видеопост юзасидан расмий баёнот берди.
Агентлик маълумотига кўра, қурилиш учун рухсатнома бериш жараёнларида кадастр идоралари иштирок этмайди. Фуқаро томонидан айрим жараёнлар нотўғри талқин қилинган.
Қайд этилишича, тадбиркор ер сотиб олгач, кадастр идоралари икки иш куни ичида унинг ер ҳуқуқини рўйхатдан ўтказади. Бу жараён қурилиш учун рухсатнома бериш билан боғлиқ эмас.
Шунингдек, кадастр идоралари қурилиш ишлари тугагач, объектни ўлчаб, кадастр паспортини расмийлаштиради. Объект фойдаланишга қабул қилинганидан кейингина кўчмас мулкка бўлган ҳуқуқлар давлат рўйхатига олинади.
Кадастр агентлиги коррупция ҳар қандай кўринишини кескин қоралишини билдирган ва тизимда шаффофликни таъминлаш бўйича қатъий чоралар кўрилаётганини таъкидлаган.