“Маҳаллани ривожлантириш ва жамиятни юксалтириш йили” Давлат дастури лойиҳаси эълон қилинди. Лойиҳа доирасида йил якунига қадар электромобилда такси хизмати кўрсатувчи ўзини ўзи банд қилган фуқаролар сонини 300 минг нафарга етказиш режалаштирилмоқда. Бу ҳақда Адлия вазирлиги хабар берди.
Мазкур мақсадга эришиш учун такси хизмати билан шуғулланаётган фуқаролар учун бир қатор имтиёзлар жорий этилиши кўзда тутилган. Хусусан, ўзини ўзи банд қилган такси ҳайдовчиларига ижтимоий солиқни тўлашда 30 фоизгача чегирма берилади.
Шунингдек, давлат ташкилотларига тегишли пулли автотураргоҳлар, жумладан, аэропорт ва темирйўл вокзалларидаги автотураргоҳлардан 30 дақиқагача бепул фойдаланишга рухсат этилади.
Давлат дастури лойиҳасида электромобил харидини рағбатлантириш чоралари ҳам белгиланган. Унга кўра, аҳолига:
- маҳаллий ишлаб чиқарилган электромобиллар учун йиллик — 12 фоиз,
- импорт қилинган электромобиллар учун йиллик — 16 фоиз ставкада банк кредитлари ажратилади.
Электромобил хариди учун бериладиган кредитлар бўйича фоиз ставкасининг ошган қисми Давлат бюджети ҳисобидан тижорат банкларига компенсация қилинади. Дастлабки босқичда 41 минг дона электромобил хариди учун имтиёзли кредит ажратиш режалаштирилган.
Бундан ташқари, электромобиллар инфратузилмасини ривожлантириш мақсадида қувватлаш станцияларида 1 кВт·соат электр энергияси нархининг 300 сўмдан ошган қисми Давлат бюджети ҳисобидан қоплаб берилади.
Қувватлаш станцияларини ташкил этиш учун тадбиркорларга йиллик 10 фоиз ставкада мақсадли кредитлар ажратилади. Ушбу маблағлар Тадбиркорликни ривожлантириш компанияси орқали молиялаштирилади.
Шунингдек, қувватлаш станциялари учун ер майдонлари аукционларда бозор қийматидан икки баравар арзон нархларда таклиф этилиши белгиланган. Режага кўра, 2026 йил охирига қадар электромобил қувватлаш станциялари сони 4 минг тага етказилади.