Тошкент шаҳар судининг жиноят ишлари бўйича апелляция инстанциясига 5 йил 3 ой озодликдан маҳрум қилинган фуқародан шикоят аризаси келди.
41 ёшли судланувчи Жиноят кодексининг 169-моддаси 3-қисми “а” банди ва 227-моддаси 2-қисми “а” бандида назарда тутилган жиноятни содир этганликда айбли деб топилиб қамоққа ҳукм қилинган.
Жиноят ишлари бўйича Юнусобод туман судининг ҳукмига кўра, судланувчи хавфли рецидивист бўла туриб, ўғирликка қўл урган. У муқаддам ўғирлик жинояти учун 3 маротаба судланган.
“Минор” масжидига гўёки намоз ўқиш ниқоби остида киради ва ўзига таниш бўлмаган фуқарога тегишли нархи 700.000 сўм бўлган бир дона эркаклар сумкачаси, унинг ичидаги фуқаролик паспорти, хизмат ва ҳайдовчилик гувоҳномаси, талони, қўл телефонини олиб кетади.
Ўша куни сумкачада жабрланувчининг телефон қувватлагич мосламасидан тортиб, нақд пуллари, дўпписи, дастрўмолчаси ва яшаш уйининг калитигача олиб қочилган. Қўлга тушганида эса қайтарилган буюмлари ичида жабрланувчига тегишли хизмат гувоҳномасини ўзи билан олиб қолган.Судлов ҳайъати жиноят ишини апелляция тартибида кўриб чиқди.
Апелляция шикоятида судланувчи ўзига қўйилган айбловдан Жиноят кодексининг 227-моддаси 2-қисми “а” бандини чиқариб ташлашни ва оилавий шароитини инобатга олиб, озодликдан маҳрум қилиш билан боғлиқ бўлмаган жазо тайинлашни сўраган.
Судлов ҳайъати апелляция шикоятини қаноатлантирилмади. Унга тайинланган жазо ўзгаришсиз қолдирилди.
Мўътабар Нурмуҳаммедова