Тожикистон Республикаси Ташқи ишлар вазирлиги Reuters агентлиги тарқатган, гўёки Тожикистон Афғонистон билан давлат чегарасини қўриқлашда Россиядан ҳарбий ёрдам сўрагани ҳақидаги хабарларни қатъий рад этди. Расмий баёнотда айтилишича, бу маълумотлар ҳақиқатга мос келмайди ва халқаро аудиторияни чалғитиши мумкин.
ТИВ таъкидлашича, мамлакат доимий равишда давлат чегарасини мустаҳкамлашга қаратилган зарур чораларни амалга ошириб келмоқда. Шунингдек, ҳозирда чегарадаги вазият тўлиқ назорат остида экани билдирилди.
Баёнотга кўра, Тожикистон–Афғонистон чегарасида ҳеч қандай хавотирли ҳолатлар кузатилмаяпти ва барқарорлик сақланмоқда. Тожикистон томонининг фикрича, ёлғон маълумотларнинг тарқалиши нотўғри тушунча уйғотиши мумкин.