Тошкент халқаро аэропортида ноқулай об-ҳаво шароити туфайли самолётлар ҳаракатига вақтинчалик чекловлар жорий этилди. Аэропорт ҳудудида кузатилаётган туман сабаб кўриниш масофаси 700 метргача қисқарган. Бу ҳақда Uzbekistan Airports хабар бермоқда.
Шу боис айрим рейсларнинг қўниши ва жўнаб кетишида чекловлар қўлланилди. Хусусан, Centrum Air авиакомпаниясининг Сеул–Тошкент ҳамда Air Samarkand’нинг Жидда–Тошкент йўналишидаги рейслари белгиланган хавфсизлик талабларига жавоб бермагани сабаб Самарқанд шаҳридаги муқобил аэродромга йўналтирилди.
Масъул хизматлар об-ҳаво шароити яхшилангандан сўнг, парвозлар одатий жадвал асосида амалга оширилишини маълум қилди. Йўловчиларга рейслар ҳолатини олдиндан текшириб бориш тавсия этилди.