1 июнь – Халқаро болаларни ҳимоя қилиш кунини Ўзбекистонда кенг нишонлаш анъанага айланган. Айни шу муносабат билан «Next» савдо-кўнгилочар марказида Мактабгача ва мактаб таълими вазирлиги ҳузуридаги Республика «Баркамол авлод» болалар мактаби ташаббуси билан иқтидорли ўқувчи-ёшларлар иштирокида «Янги Ўзбекистоннинг бахтиёр болалари» шиори остида фестиваль бўлиб ўтади.
«Фестиваль кун тартибидан жойлардаги ’Баркамол авлод‘ болалар мактаблари тўгарак аъзолари тайёрлаган қўл меҳнати намуналари кўргазмаси ҳам ўрин олган», - дейди Республика «Баркамол авлод» болалар мактаби директори Севара Маҳмудова.
Шунингдек, фестивалда болалар ижодий ишларининг сотуви ҳам ташкил этилади. Сотувдан тушган пуллар эса хайрия акцияларига йўналтирилади.
Фестиваль доирасида «Баркамол авлод» болалар мактаблари тўгарак аъзолари ҳамда ўзбек эстрадасининг ёрқин юлдузлари иштирокида концерт дастурлари, қайноқ лазер шоу дастурлари, мусиқали фонтан ва ижодий чиқишлар ташкил этилади. Бундан ташқари, «Uzbekistan Foreign Experts group» халқаро ташкилоти билан ҳамкорликда ўтказилган «Entry ijodkorlik» республика онлайн танлови ғолиблари тақдирланади.
Эслатиб ўтамиз, бундай фестиваллар жойлардаги «Баркамол авлод» болалар мактаблари томонидан Ўзбекистоннинг барча ҳудудлари марказий истироҳат боғлари, хиёбон ва кўнгилочар масканларида ташкил этилади.