Тошкентда электр таъминотига оид киритилган қисқа муддатли чекловлар 16 декабргача амал қилади. Бу ҳақда “Ҳудудий электр тармоқлари” АЖнинг Тошкент шаҳар филиали хабар берди.
“Ҳаво ҳароратининг совиб кетиши ҳамда юқори истеъмол вақтларида Тошкент шаҳрига белгиланган истеъмол топшириғини бажариш, ишлаб чиқаришдаги технологик жараёнлар тўхтаб қолишининг олдини олиш, электр энергияси ишлаб чиқариш ва истеъмол мувозанатини ушлаб туриш ҳамда таъминотдаги тартибсиз узилишларни бартараф этиш мақсадида пойтахт ҳудудларида туман ҳокимликлари билан келишган ҳолда аввал эълон қилинган электр энергияси таъминотига оид киритилган қисқа муддатли чекловлар декабр ойининг 14, 15 ҳамда 16 саналарида ҳам амал қилишини маълум қиламиз”, — дейилади хабарда.
Компания электр энергияси таъминоти билан боғлиқ ҳар қандай муаммоли вазиятда 1154 қисқа рақамли Call-марказига қўнғироқ қилиш ёки “Ҳудудий электр тармоқлари” АЖ билан мулоқот каналининг администраторига (Telegram’даги @HET_admin) мурожаат йўллаш мумкинлигини эслатган.
Эслатиб ўтамиз, республикада электр энергиясини тежаш мақсадида 2 соатдан ортиқ бўлмаган режали ўчиришлар бошланиши айтилганди. Электр узилишлари 2 соатдан ошиб кетмаслигига кафолат берилганди.
