Тошкент шаҳар божхона бошқармаси Контрабандага қарши курашиш бўлими томонидан Давлат хавфсизлик хизмати ходимлари билан ҳамкорликда гиёҳвандлик воситаларининг навбатдаги ноқонуний айланмасига чек қўйилди.
Пойтахтимизнинг Шайҳонтоҳур туманида ўтказилган тезкор тадбир давомида олдиндан тезкор кузатувга олинган 2 нафар шахслар холислар иштирокида кўздан кечирилганида, улардан бирига тегишли “Спарк” автомашинасининг олд ўриндиғидаги пакетда Марказий божхона лабораторияси хулосасига кўра 215.56 гр. марихуана гиёҳвандлик воситаси борлиги аниқланди.
Шунингдек, ушбу шахснинг мазкур туманда истиқомат қилаётган хонадони кўздан кечирилганида, бу ерда ҳам экспертиза хулосасига кўра 76,2 гр. оғирликдаги марихуана гиёҳвандлик воситаси сақланаётгани фош бўлди.
Шундай қилиб, тезкор тадбирда жами 291,76 гр. марихуана гиёҳвандлик воситаси процессуал тартибда расмийлаштирилиб олинди.
Ҳолат юзасидан Тошкент шаҳар божхона бошқармаси томонидан жиноят иши қўзғатилди.
Эслатиб ўтамиз, пойтахт божхоначилари жорий йилнинг дастлабки 5 ойи давомида аниқланган 19 та ҳолатда 5,1 кг.дан зиёд оғирликдаги гиёҳвандлик воситалари ҳамда 3 та ҳолатда 1645 дона кучли таъсир қилувчи дори воситаларининг ноқонуний муомаласига чек қўйишган.