Тергов департаменти маълумотларига кўра, 28 июнь куни Бектемир тумани Чирчиқ бўйи кўчасида хизмат вазифасини олиб бораётган ИИО ФМБ ППХ ходимлари томонидан 25 ёшли йигит тўхтатиб текширилганда чўнтагидан гиёҳванд моддага ўхшаш модда борлиги аниқланиб, ашёвий далил сифатида расмийлаштириб олинган.
Терговга қадар текширув ҳаракатлари давомида гумонланувчидан ушбу моддани кимдан ва қаердан олгани сўралганида, у ушбу гиёҳванд моддасини геолокация асосида кўмиб қўйиш учун олиб кетаётганлигини ва Бектемир тумани Чирчиқ бўйидаги маҳаллаларнинг бирига мижозлар учун жами 23 дона ўрамдаги гиёҳванд моддаларни кўмиб чиққанлигини маълум қилган.
Тошкент шаҳар ИИББ ЭКМнинг судга оид кимёвий экспертиза хулосасига кўра, гумонланувчидан олинган модда таркибида альфа-пирролидиновалерофенон мавжуд бўлиб, бу модда «альфа-пирролидиновалерофенон (a-PVP)» деб аталиши ва умумий оғирлиги 22,4 граммга тенглиги кўрсатилган.
Ҳозирда мазкур ҳолат юзасидан И.К. га нисбатан Жиноят кодекснинг 273-моддаси 5-қисми (гиёҳвандлик воситалари, уларнинг аналоглари ёки психотроп моддаларни кўп миқдорда қонунга хилоф равишда сотиш) билан жиноят иши қўзғатилган.