"Лента" нашри ва "Профиль" журналида фаолият юритган россиялик журналист Инесса Паперная Тошкент шаҳридаги меҳмонхоналардан бирида ўлик ҳолда топилди.
Хабарларга кўра, журналист Ўзбекистонга дам олиш учун келган. У ҳамроҳи билан “Караман Паласе” меҳмонхонасига жойлашган. 20 октябрь куни кечқурун Инессага почта жўнатмаси келган. Меҳмонхона ходимлари эшикни тақиллатишса ҳам ҳеч ким жавоб бермагач, хонани очишга қарор қилинади. Эшик очилиб, хонага кирилганда ичкарида иккита жасад – Паперная ва унинг дўстининг жонсиз танаси топилган.
Дастлабки тахминларга кўра, марҳумлар вентилясия тизимига кириб қолган газдан заҳарланган. 20 октябрга ўтар кечаси меҳмонхонада бассейн тозаланган – чамаси, газ қувурдан кўтарилиб, Папернаянинг хонасига кириб қолган.
Қайд этилишича, ҳодиса юз берганидан сўнг “Караман Паласе” меҳмонхонаси муҳрланган, ҳозирда тергов ишлари олиб борилмоқда.