“Lenta” nashri va “Profil” jurnalida faoliyat yuritgan rossiyalik jurnalist Inessa Papernaya Toshkent shahridagi mehmonxonalardan birida o‘lik holda topildi.
Xabarlarga ko‘ra, jurnalist O‘zbekistonga dam olish uchun kelgan. U hamrohi bilan “Karaman Palace” mehmonxonasiga joylashgan. 20-oktyabr kuni kechqurun Inessaga pochta jo‘natmasi kelgan. Mehmonxona xodimlari eshikni taqillatishsa ham hech kim javob bermagach, xonani ochishga qaror qilinadi. Eshik ochilib, xonaga kirilganda ichkarida ikkita jasad – Papernaya va uning do‘stining jonsiz tanasi topilgan.
Dastlabki taxminlarga ko‘ra, marhumlar ventilyasiya tizimiga kirib qolgan gazdan zaharlangan. 20-oktyabrga o‘tar kechasi mehmonxonada basseyn tozalangan – chamasi, gaz quvurdan ko‘tarilib, Papernayaning xonasiga kirib qolgan.
Qayd etilishicha, hodisa yuz berganidan so‘ng “Karaman Palace” mehmonxonasi muhrlangan, hozirda tergov ishlari olib borilmoqda.