Кеча ижтимоий тармоқларда “Афросиёб” поезди ниманидир ёки кимнидир уриб кетганми?” номли хабар тарқалди.
Аниқланишича, 2022 йил 11 ноябрь куни соат 05:31 да “Бухоро-Самарқанд-Тошкент йўналишидаги 765-сонли юқори тезликда ҳаракатланувчи “Афросиёб” тез юрар йўловчи поезди “Зирабулоқ – Каттақўрғон темир йўл бекатлари оралиғининг 3816 км. 3-пикетида темир йўл изида қаровсиз юрган 18 бош қўйни уриб юборган.
«Мазкур ҳолат бўйича ҳужжатлар расмийлаштирилиб, қўйларни эгаси ҳамда етказилган зарар миқдори аниқланмоқда. Ҳозирги кунда Самарқанд вилояти Транспортда ХТБ томонидан терговга қадар текширув ишлари олиб борилмоқда», — дейилади хабарда.
Бугун интернет оламида хабарнинг тарқалиши жуда тез. Аммо матбуот хизматлари, одатда, хабар тарқалиб бўлгандан сўнггина расмий изоҳ беради. Жумладан, юқоридаги хабар ҳам, аслида 11 ноябрь куни тонгда содир бўлган. Бу ҳақда тегишли ташкилот мутасаддилари хабар топгани аниқ. Аммо расмий муносабат орадан 3 кун ўтиб берилди.