АҚШ президенти Доналд Трамп ўз ваколат муддати якунлангач ҳам “Тинчлик Кенгаши” раиси лавозимида қолиши мумкин. Бу ҳақда Bloomberg агентлиги АҚШ маъмуриятидаги манбага таяниб хабар берди.
Маълумотларга кўра, Трамп истеъфога чиққунга қадар Кенгашга раислик қилади. Шундан сўнг эса АҚШнинг кейинги президенти ушбу орган таркибига АҚШнинг расмий вакилини тайинлаш ҳуқуқига эга бўлади. Нашр таъкидлашича, Трампнинг ташкилотга узоқ муддат, эҳтимол умрбод раҳбарлик қилиши эҳтимоли Г7 етакчилари учун қўшимча сиёсий мураккабликлар туғдириши мумкин.
“Тинчлик Кенгаши”ни ташкил этиш ташаббуси Доналд Трамп томонидан жорий йил январь ойида расман эълон қилинган. Дастлабки концепция эса 2025 йил ноябрь ойида тақдим этилган эди. Ўша пайтда БМТ мазкур ғояни қўллаб-қувватлаган бўлиб, Кенгаш Ғазо секторини қайта тиклаш бўйича молиявий жараёнларни мувофиқлаштириши кутилган.
Ахиос маълумотларига кўра, дунёнинг 58 нафар етакчисига “Тинчлик Кенгаши”га қўшилиш бўйича таклифнома юборилган. Улар орасида Ўзбекистон Президенти Шавкат Мирзиёев, Россия президенти Владимир Путин ҳам бор. Россия ТИВ раҳбари Сергей Лавровнинг маълум қилишича, Москва низом лойиҳасини қабул қилиб олган ва ҳужжат кенг ваколатларга эга эканини қайд этган.
Блоомберғнинг аниқлик киритишича, АҚШ маъмурияти шартларига кўра, Кенгашнинг доимий аъзоси бўлиш учун ҳар бир давлат камида 1 миллиард АҚШ доллари миқдорида бадал тўлаши лозим. Қарорлар ҳар бир давлатдан биттадан овоз асосида кўпчилик томонидан қабул қилинади, бироқ якуний тасдиқ раис ваколатига киради.