Стив Уиткофф Вашингтонда Россия президентининг махсус вакили Кирилл Дмитриев билан ўтказилган учрашувдан кейин Доналд Трампга Кремлнинг позициясини етказган. Унга кўра, Россия Украинанинг тўртта ҳудуди — Донеск, Луганск, Запороже ва Херсон вилоятлари устидан тўлақонли назорат ўрнатишни талаб қилган.
Уиткофф Трампга ушбу шартнинг бажарилиши Украина бўйича тинчлик сулҳини тезроқ имзолашга ёрдам беришини айтган. АҚШ президентининг Украина бўйича махсус вакили Кит Келлог эса Стив Уиткоффнинг бу фикрини қўллаб-қувватламаган. Келлог Трампга Украина ушбу ҳудудлар бўйича айрим шартларга кўнишини, аммо ҳеч қачон бир томонлама тартибда уларнинг Россияга бериб юборилишига рози бўлмаслигини маълум қилган.
Россия ўт очишни тўхтатиш учун илгари сураётган шартлар Трамп маъмуриятида келишмовчиликларни кучайтирмоқда. АҚШ президентининг Республикачилар партиясидаги айрим тарафдорлари Стив Уиткоффни ушбу масалада Россия тарафини олишда айблашди.
Кирилл Дмитриев Вашингтонга апрель бошларида борган эди. Бу Украинага қарши уруш бошланганидан бери Россия расмий вакилининг Қўшма Штатларга юқори даражадаги биринчи ташрифи ҳисобланади. Стив Уиткофф сўнгги икки ой ичида Россияга уч маротаба борди. 11 апрель куни у Санкт-Петербургда Владимир Путин билан учрашув ўтказди.