Stiv Uitkoff Vashingtonda Rossiya prezidentining maxsus vakili Kirill Dmitriyev bilan o‘tkazilgan uchrashuvdan keyin Donald Trampga Kremlning pozitsiyasini yetkazgan. Unga ko‘ra, Rossiya Ukrainaning to‘rtta hududi — Donesk, Lugansk, Zaporoje va Xerson viloyatlari ustidan to‘laqonli nazorat o‘rnatishni talab qilgan.
Uitkoff Trampga ushbu shartning bajarilishi Ukraina bo‘yicha tinchlik sulhini tezroq imzolashga yordam berishini aytgan. AQSH prezidentining Ukraina bo‘yicha maxsus vakili Kit Kellog esa Stiv Uitkoffning bu fikrini qo‘llab-quvvatlamagan. Kellog Trampga Ukraina ushbu hududlar bo‘yicha ayrim shartlarga ko‘nishini, ammo hech qachon bir tomonlama tartibda ularning Rossiyaga berib yuborilishiga rozi bo‘lmasligini maʼlum qilgan.
Rossiya o‘t ochishni to‘xtatish uchun ilgari surayotgan shartlar Tramp maʼmuriyatida kelishmovchiliklarni kuchaytirmoqda. AQSH prezidentining Respublikachilar partiyasidagi ayrim tarafdorlari Stiv Uitkoffni ushbu masalada Rossiya tarafini olishda ayblashdi.
Kirill Dmitriyev Vashingtonga aprel boshlarida borgan edi. Bu Ukrainaga qarshi urush boshlanganidan beri Rossiya rasmiy vakilining Qo‘shma Shtatlarga yuqori darajadagi birinchi tashrifi hisoblanadi. Stiv Uitkoff so‘nggi ikki oy ichida Rossiyaga uch marotaba bordi. 11 aprel kuni u Sankt-Peterburgda Vladimir Putin bilan uchrashuv o‘tkazdi.