Россия ҳарбийлари 13 август куни Қора денгизда Сукра Окан юк кемасини тўхтатиш учун огоҳлантирган ўт очиши ортидан Туркия Москвага огоҳлантириш юбориб, бундан буён кескинлашмасликни сўраган. Бу ҳақда Туркия президенти Ражаб Тоййиб Эрдоғон маъмуриятининг Алоқа бўлими қошидаги Дезинформацияга қарши кураш маркази маълум қилди.
Таъкидланишича, кема Палау байроғи остида сузиб юрган, юк кемасининг эгаси ва экипажи Туркия фуқаролари бўлган.
«Россия аралашувидан сўнг Россия Федерациясидаги ҳамкорларимиз Қора денгиздаги кескинликнинг кучайишига олиб келадиган бундай ҳаракатлардан қочиш ҳақида тегишли равишда огоҳлантирилди», — дейилади ҳисоботда.
Daily Sabah нашрининг ёзишича, шу тариқа Эрдоғоннинг идораси Анқара воқеа юзасидан оммавий изоҳ бермагани ҳақидаги танқидларга жавоб қайтарган. Марказ Палау ҳодисага техник жавоб бериши кераклигини айтди. Марказ, «Сукру Оканнинг эгаси турк бўлса ҳам, кема Туркия байроғи остида сузиб юрмайди», деди ва бу ҳолатда кема эгасининг кимлиги эмас, қайси байроқ остида бўлганлиги муҳимроқ эканини қайд этди.
Маълумот учун, аввалроқ Россия Мудофаа вазирлиги Қора денгиз флотининг «Василий Биков» патруль кемаси Палау байроғи остида Украинанинг Измаил портига сузиб келган қуруқ юк кемасини аниқлагани ва «текширувни тўхтатиш талабига жавоб бермагани» ҳақида хабар берганди. Вазирликнинг таъкидлашича, «Россия ҳарбий кемасидан кеманинг мажбуран тўхтатилиши учун автоматик ўқ отиш қуролларидан огоҳлантирувчи ўқ очилган». Кема тўхтагач, рус ҳарбийлари юк кемасига ўтириб, текширув ўтказган.
Шундан сўнг, Мудофаа вазирлиги кема текшируви акс этган видеони эълон қилди. Тасвирларда ҳарбий кийимдаги эркак палубада тургани, яқин атрофда одамлар қўлларини бошлари орқасида тиз чўкиб ўтирганини кўриш мумкин. Кейин ҳарбийлар қўлларида қурол билан юк кемаси бўйлаб юриб, бошқарув хонасига кириб, двигателни тўхтатишни талаб қилишади.