Туркия Ички ишлар вазирлиги Анқара ва Истанбул шаҳарларида террорчилик фаолиятига алоқадорликда гумон қилинган 127 нафар шахс қўлга олинганини маълум қилди.
Улар ИШИД террорчилик ташкилоти билан боғлиқликда гумон қилинмоқда.
AZERTAC хабарига кўра, ҳибсга олишлар 29 декабрь куни Ялова вилоятида полиция ходимлари билан юз берган қуролли тўқнашув ортидан бошланган кенг кўламли махсус операциялар доирасида амалга оширилган.
Истанбул шаҳар прокуратураси маълумотига кўра, операциялар Янги йил арафасида содир этилиши мумкин бўлган эҳтимолий террорчилик ҳужумлари ҳақидаги разведка маълумотларини таҳлил қилиш асосида ўтказилган. Қўлга олинганларнинг 110 нафари Истанбул шаҳрида аниқланган бўлиб, улар орасида чет эл фуқаролари ҳам бор.
Аввалроқ, Ялова вилоятида ИШИД жангчилари билан бўлган отишмада уч нафар полиция ходими ҳалок бўлгани, саккиз нафар ҳуқуқни муҳофаза қилиш органлари ходими ва бир нафар қўриқчи жароҳатлангани хабар қилинган эди. Тўқнашув давомида олти нафар террорист йўқ қилинган.