Равшан Ҳайдаров бошчилигидаги Ўзбекистон Олимпия терма жамоаси U-23 Осиё кубоги “C” гуруҳи доирасида Жанубий Кореяга қарши баҳсда ишончли ғалабага эришди. Ар-Риёд шаҳридаги “Шаҳзода Файсал бин Фаҳд” стадионида бўлиб ўтган учрашув 2:0 ҳисобида жамоамиз фойдасига ҳал бўлди.
Баҳсдаги ҳисоб 48-дақиқада Беҳрузжон Каримов томонидан очилди. Иккинчи бўлимда ўзбекистонлик футболчилар устунликни сақлаб қолди ва 70-дақиқада жамоа сардори Саидумархон Саиднуриллаев гол уриб, ўйинга якуний нуқтани қўйди.
Мазкур ғалаба Ўзбекистонга “C” гуруҳида 1-ўринни таъминлади ва чорак финал йўлланмасини олиб келди. Гуруҳнинг яна бир учрашувида Ливан Эронни 1:0 ҳисобида мағлуб этиб, турнир жадвалида муҳим ўзгаришларга сабаб бўлди. Жанубий Корея эса 2-ўрин билан плей-офф босқичига йўл олди.
Маълумот учун, ушбу турнирда Ўзбекистон 2028 йилги Лос-Анжелес Олимпия ўйинларига тайёргарлик кўраётган U-21 терма жамоаси билан иштирок этмоқда. “Оқ бўрилар” чорак финал учрашувини 17 январ куни “D” гуруҳида 2-ўринни эгаллаган жамоага қарши ўтказади.