Венесуэлада сиёсий сабаблар билан ҳибсга олинган шахсларни қамоқхоналардан озод этиш жараёни бошланди. Бу ҳақда маҳаллий ва халқаро оммавий ахборот воситалари ҳамда ҳуқуқ ҳимоячилари маълум қилмоқда, деб ёзади the Guardian нашри.
Форо Пенал ҳуқуқни ҳимоя қилиш ташкилоти маълумотига кўра, илк озод этилганлар орасида мухолифат етакчиларидан бири, Нобел тинчлик мукофоти совриндори Мария Корина Мачадо жамоасидан бўлган собиқ президентликка номзод Биагио Пилиери бор. Шунингдек, 2024 йилги сайловларда президентликка номзод сифатида қатнашган мухолиф сиёсатчи Энрике Маркес ҳам қамоқдан чиқарилган.
Бундан ташқари, Венесуэла ҳукумати бир қатор хорижий фуқароларни ҳам озод қилган. Жумладан, Испания Ташқи ишлар вазирлиги беш нафар испан фуқароси, улар орасида ҳуқуқ ҳимоячиси, испан-венесуэлалик адвокат Росио Сан-Мигел ҳам борлигини тасдиқлади. Улар Каракасдаги Испания элчихонаси кўмагида мамлакатни тарк этишга тайёрланаётгани айтилмоқда.
Венесуэла Миллий ассамблеяси раҳбари Хорхе Родригес бу қарорни “республикада тинчлик ва тотувликни мустаҳкамлаш йўлидаги бир томонлама қадам” деб атади. Мухолифат етакчиси Мария Корина Мачадо эса озодликлар “адолатсизлик абадий эмаслигини яна бир бор исботлаган муҳим сигнал” эканини таъкидлади.
Ҳуқуқ фаоллари эҳтиёткорлик билан оптимистик муносабат билдирмоқда. Уларнинг ҳисоб-китобларига кўра, мамлакатда ҳануз 800 нафардан ортиқ сиёсий маҳбус қолмоқда. Ташкилотлар барча маҳбуслар тўлиқ ва шартсиз озод этилишини талаб қилмоқда.