Фирибгарлик ва одам савдоси билан боғлиқ жиноятларда айбланиб, халқаро қидирувда бўлган икки нафар шахс Грузия ҳудудида аниқланиб, Интерпол каналлари орқали Ўзбекистонга экстрадиция қилинди.
Ички ишлар вазирлиги ҳузуридаги Интерпол Миллий марказий бюроси маълумотига кўра, халқаро ҳамкорлик доирасида олиб борилган тезкор-қидирув тадбирлари давомида йирик миқдордаги фирибгарлик ҳамда одам савдоси жиноятларида гумон қилинаётган шахсларнинг давлат чегарасидан ташқарида эканлиги аниқланган. Кейинчалик улар Грузия ҳуқуқни муҳофаза қилувчи органлари томонидан ҳибсга олинган.
Экстрадиция жараёни Ўзбекистон Республикаси Бош прокуратурасининг расмий илтимосномаси асосида амалга оширилди. Тегишли тергов материаллари Грузиянинг ваколатли органлари томонидан ўрганиб чиқилиб, Грузия Адлия вазирлиги томонидан гумондорларни Ўзбекистонга топшириш тўғрисида қарор қабул қилинди.
Мазкур топшириш Интерполнинг Тошкент ва Тбилиси шаҳарларидаги Миллий марказий бюролари ўртасидаги ўзаро ҳамкорлик натижасида амалга оширилган. Экстрадиция қилинган шахслар Ислом Каримов номидаги Тошкент халқаро аэропортида Ўзбекистон ҳуқуқни муҳофаза қилиш органлари ходимларига топширилди.