Бугун Пекинда Хитой – Қирғизистон – Ўзбекистон темир йўли қурилиши бўйича стратегик лойиҳани амалга ошириш бўйича келишув имзоланди.
Хитойнинг Қашғар шаҳридан Ўзбекистоннинг Андижон шаҳригача бўлган 450 км темир йўл қурилади. Шавкат Мирзиёев Ўзбекистон, хусусан, Андижон учун муҳим бўлган ушбу шартномани имзолаш маросими иштирокчиларига мурожаат қилди.
"Бу темир йўл Хитойни минтақамиз билан боғловчи энг қисқа қуруқликдаги йўл бўлади. Келгусида бу йўл мамлакатларимизга истиқболли Трансафғон йўлаги орқали Жанубий Осиё ва Яқин Шарқнинг кенг бозорларига чиқиш имконини беради", — деди давлат раҳбари ўз мурожаатида.
Лойиҳанинг натижаси қуйидагича бўлиши кутилмоқда:
• иқтисодий самара берадиган янги корхоналар ва ўн минглаб иш ўринлари яратилиши;
• ўзаро савдо ҳажми каррасига ошиши;
• саноат кооперацияси кенгайиши, инвестисиявий жозибадорлик ўсиши кўзда тутилган.
Бундан ташқари, тадбиркорлар учун бу юк ташишнинг қулай йўли бўлади. Дастлабки тахминларга кўра, юк ташиш ҳажми йилига 12-15 миллион тоннани ташкил этади.