АҚШнинг НАТОдаги элчиси Метю Уитакернинг сўзларига кўра, Хитой Владимир Путинга битта телефон қўнғироғи билан Украинадаги урушни тўхтатиши ва унга икки мақсадли технологияларни сотишни тўхтатишни талаб қилиши мумкин. Бу ҳақда Bloomberg хабар берди.
Уитакер бу фикрни Мюнхен хавфсизлик конференциясида бўлиб ўтган панель муҳокамасида билдирган. Унинг сўзларига кўра, Пекин шунингдек, Россия нефть ва газини сотиб олишни тўхтатиши ва шу орқали урушга чек қўйиши мумкин. У Украинага бостириб кириш ҳаракати “Хитой томонидан тўлиқ қўллаб-қувватланаётганини” ҳам таъкидлаган.
Агентлик хабарига кўра, тўлиқ кўламли уруш бошланганидан бери Пекин ва Москва ўзаро ҳамкорликни мустаҳкамлаган. Россия дронлар ва бошқа ҳарбий техника учун муҳим компонентлар бўйича Хитойга таянади. Шу билан бирга, Хитой Россиянинг хом нефтининг энг йирик харидорига айланиб, январь ойида ўз портларига кунига 1,65 миллион баррель нефть юклаган. Бу 2024 йил март ойидан бери энг юқори кўрсаткич ва 2022 йилдан бери иккинчи энг катта ойлик ҳажмдир.
Агентликнинг таъкидлашича, Пекин ўзининг «конструктив» позициясини бир неча бор эълон қилган бўлсада, 2022 йилдан бери Кремль билан алоқаларни мустаҳкамлашга давом этмоқда. Хитой Россиянинг қурол ишлаб чиқариш учун зарур бўлган компонентларини, жумладан дронларни етказиб беради.