Хитой шимоли ва пойтахт Пекинга ёпирилган кучли шамол транспорт тизимига жиддий таъсир кўрсатди. Хабарларга кўра, Пекиндаги икки йирик аэропортда жами 838 та авиарейс бекор қилинган.
Шунингдек, аэропорт метроси ва юқори тезликдаги темир йўлнинг айрим йўналишлари ҳам вақтинча тўхтатилган. Бўрон сабабли шаҳардаги кўплаб диққатга сазовор жойлар, боғлар ва тарихий масканлар ёпилган.
Шамол тезлиги соатига 150 кмгача етган. Мутахассислар бу даражадаги кучли шамол Пекинда сўнгги 50 йилдан ортиқ вақт ичида биринчи марта кузатилаётганини таъкидлашмоқда.
Об-ҳаво ноқулайлиги дам олиш кунлари ҳам давом этиши кутилмоқда. Расмийлар тана вазни 50 кг дан кам бўлган фуқароларга кўчага чиқмасликни тавсия қилмоқда.
