Хоразм вилоятида яширин ва уюшган тарзда жамоат тартибига таҳдид солиб келган, ўз атрофида ноқонуний «кўча» муҳитини шакллантириб, фуқароларга нисбатан зўравонлик содир этган уч нафар шахс қўлга олинди. Бу ҳақда Ички ишлар вазирлиги матбуот хизмати хабар берди.
Қайд этилишича, вилоят ИИБ тезкор-қидирув хизмати ҳамда Давлат хавфсизлик хизмати вилоят бошқармаси ҳамкорлигида ўтказилган тезкор тадбирлар давомида безорилик ҳолатларига алоқадор шахслар фош этилган.
Хусусан, 1996 йилда туғилган, Урганч туманида яшовчи Жамол Аҳмедов (лақаби — Жомми Даритал) Урганч шаҳридаги марказий деҳқон бозори ҳудудида бир фуқарога асоссиз равишда тан жароҳати етказган. Ушбу ҳолат бўйича суриштирув бошланганидан сўнг, у жабрланувчига босим ўтказишга уринган. Текширув жараёнида Аҳмедовнинг ёнидан 3 грамм марихуана аниқланиб, ашёвий далил сифатида расмийлаштирилган.
Шунингдек, 1997 йилда туғилган, Боғот туманида яшовчи Артур Мақсабоев (лақаби — Малиш) ҳамда 1991 йилда туғилган, Хива шаҳрида истиқомат қилувчи Расулбек Фарҳодбеков (лақаби — Расул қилич) томонидан турли вақтларда фуқароларга нисбатан зўравонлик ҳолатлари содир этилгани аниқланган.
Мазкур уч ҳолат юзасидан гумондорларга нисбатан Жиноят кодексининг 277-моддаси 3-қисми (безорилик) билан, Жамол Аҳмедовга эса қўшимча равишда 276-моддаси 2-қисми билан жиноят иши қўзғатилди. Гумондорларга нисбатан эҳтиёт чораси сифатида қамоқ қўлланилган. Ҳозирда дастлабки тергов ҳаракатлари олиб борилмоқда.
Ички ишлар органлари ушбу шахслардан жабрланган фуқароларни тегишли тартибда мурожаат қилишга чақирди.