Уларни ташкил этишдан тортиб, оёққа туриб ривожланишигача давлат томонидан қўллаб-қувватланмоқда. Илгари бир корхона очиш учун ойлаб, баъзан йиллаб давлат идоралари эшиги олдида сарсон-саргардон юрилган бўлса, энди жойлардаги давлат хизматлари кўмагида саноқли кунлар ичида очиб, ишга тушириш имконияти яратилди.
Ҳозирги кунда хусусий мулкчиликнинг турли шакллари пайдо бўлмоқда. Хусусий боғчалар ҳам ана шулар жумласидан. Шу боис кўпчиликда хусусий боғча очиш учун қаерга мурожаат қилиш керак, унинг учун қандай ҳужжатлар зарур, деган саволлар пайдо бўлиши, шубҳасиз. Бу, айниқса, хусусий боғча очиш ниятида юрганлар учун муҳим.
Ўзбекистон Республикаси Вазирлар Маҳкамаси ҳузуридаги Таълим сифатини назорат қилиш давлат инспекцияси лицензиялаш бўйича бош мутахассиси Шарофиддин Ҳамзаев бу борада қуйидагиларни маълум қилди:
— Фаолиятни бошлаш учун, энг аввало, муқим бир жой (бино) танланади ва у керакли анжомлар билан жиҳозланади. Шундан сўнг лицензия олиш жараёни бошланади. Лицензия олиш учун Вазирлар Маҳкамаси ҳузуридаги Таълим сифатини назорат қилиш давлат инспекциясига мурожаат қилинади. Бу борада Вазирлар Маҳкамасининг 2018 йил 27 мартдаги қарори мавжуд.
Нодавлат таълим хизматлари кўрсатиш соҳасида таълим турлари бўйича лицензия олиш учун қуйидаги ҳужжатлар давлат хизматлари марказига тақдим этилади ёки электрон шаклда Ягона интерактив давлат хизматлари порталига юборилади.
Биринчиси, лицензия бериш тўғрисидаги ариза. Унда ким юридик шахс бўлиши, хусусий боғчанинг ташкилий-ҳуқуқий шакли, жойлашган манзили, почта манзили, банк муассасаси номи, банкдаги ҳисоб рақами, фаолиятнинг лицензияланаётган тури, таълим фаолияти йўналишлари рўйхати келтирилади. Бундан ташқари, аризада хусусий мулк эгасининг лицензия талаблари ва шартларига розилиги ва электрон манзили кўрсатилади.
Иккинчи ҳужжат ёнғин ва санитария-эпидемиология назорати органларининг мавжуд бино ва хоналарнинг ёнғин хавфсизлиги талаблари ва санитария-гигиена меъёрларига мувофиқлиги тўғрисидаги хулосаларидан иборат. Учинчи ҳужжатда педагог кадрлар ҳақида маълумот берилади. Тўртинчисида ўқув режаси ва дастурларининг электрон нусхаси тақдим этилади.
Aгар сиз ихтисослаштирилган нодавлат мактабгача таълим ташкилоти ташкил этмоқчи бўлсангиз, Мактабгача таълим вазирлиги ва Соғлиқни сақлаш вазирлиги томонидан тегишли рухсатномалар оласиз ва унинг нусхаларини лицензия олиш тўғрисидаги аризага илова қиласиз.
Сўнг аризани кўриб чиқиш учун тўлов қиласиз. Тўлов миқдори базавий ҳисоблашнинг икки бараварига тенг. Aгар сиз Ягона портал орқали мурожаат қилишни мўлжаллаётган бўлсангиз, юқоридаги суммадан бироз кам, яъни унинг 90 фоизини тўлайсиз.
Лицензия олиш тўғрисидаги аризада кўрсатилган электрон манзил сизнинг электрон шаклда хабарнома олишга бўлган розилигингиз ҳисобланади.
Давлат хизматлари марказлари ёки Ягона интерактив давлат хизматлари портали орқали зарур маълумотлар сизнинг электрон рақамли имзонгиз билан тасдиқланади.
Aризангизда агар камчиликлар бўлса, кўриб чиқилмайди. Дарвоқе, сиз агар ёлғон ёки нотўғри маълумот берсангиз қонун ҳужжатларида белгиланган тартибда жавобгарликка тортилишингиз мумкин.
Лицензия олганингиздан сўнг бемалол фаолиятингизни бошлашингиз мумкин. Чунки сиз энди тадбиркорсиз. Лицензия сизга чексиз муддатга берилади. Уни деб бошқа овора бўлмайсиз.
Достонбек Бахтиёрзода