Ўзбекистонда хусусий секторда меҳнат қилаётган 1,8 миллион аёлнинг бор-йўғи 1 фоизи — яъни 15 минг нафари декрет таътилидан фойдаланган. Савдо-саноат палатаси маълумотига кўра, бу кўрсаткич давлат бюджети ҳисобидан фаолият юритувчи ташкилотлар билан солиштирганда кескин паст. Бу ҳақда Савдо-саноат палатаси хабар бермоқда.
Бюджет ташкилотларида жами 1,4 миллион аёл ишлайди ва улардан қарийб 120 минг нафари туғуруқ таътилига чиққан. Хусусий секторда эса ижтимоий кафолатларнинг етарли эмаслиги сабаб аёлларнинг аксарияти декрет таътилидан фойдаланмай келмоқда.
Мазкур муаммони ҳал этиш мақсадида янги давлат ижтимоий суғурта тизими жорий этилмоқда. Унга кўра, хусусий секторда ишловчи аёлларга ҳам ҳомиладорлик ва туғуруқ таътили нафақалари кафолатланган механизм асосида тўланади. Бу тизим тадбиркорлар учун ходимларни ижтимоий қўллаб-қувватлаш юкини камайтириб, меҳнат муносабатларида аниқлик ва ишончни ошириши кутилмоқда.
Маълум қилинишича, 2026 йилдан бошлаб аёлларга ҳомиладорлик нафақалари, йилнинг иккинчи ярмидан эса вақтинча меҳнатга лаёқатсизлик нафақалари Ижтимоий ҳимоя жамғармаси орқали босқичма-босқич тўлаб борилади. Ушбу ташаббус малакали кадрларни сақлаб қолиш ва хусусий секторда бандлик барқарорлигини таъминлашга хизмат қилади.