Ўзбекистон Республикаси Олий Мажлиси Сенатининг Бюджет ва иқтисодий масалалар қўмитаси раиси ўринбосари Кобул Турсунов томонидан Рақамли технологиялар вазири Шерзод Шерматов номига сенатор сўрови юборилди. Бу ҳақда Сенат матбуот хизмати маълум қилди.
Сўровда IMEI-кодларни рўйхатга олиш жараёнида юзага келаётган қатор муаммолар тилга олинган. Маълумки, 2019-йилдан бошлаб Ўзбекистонда мобил қурилмаларни IMEI-коди орқали рўйхатдан ўтказиш амалиёти жорий этилган. 2024-йилдан эса бу жараёнга божхона декларацияси орқали кириш талаби қўшилган. Яъни, қурилма мамлакатга олиб кирилар экан, унга декларация расмийлаштирилмаса, IMEI-кодни рўйхатдан ўтказиш учун божхона қийматининг 30 фоизи миқдорида тўлов ундирилмоқда.
Сўнгги вақтларда мазкур жараёндаги муаммолар ижтимоий тармоқларда кенг муҳокама қилинмоқда. Хусусан, фуқаролар uzimei.uz, my.gov.uz порталлари ва “BIRDA” иловасида рўйхатдан ўтказиш имкониятларининг вақтинча чеклангани, айрим ҳолларда хизмат ҳақларининг асоссиз оширилгани ҳақида эътироз билдирмоқда.
Шунингдек, сенатор сўровда иккинчи SIM-картали телефонлар учун IMEI2-кодни алоҳида рўйхатдан ўтказиш ва ушбу амални фақат биринчи рўйхатга олинган манзилда бажариш зарурати фуқаролар учун қўшимча қулайликсизликлар ва харажатлар туғдираётгани алоҳида таъкидланган.
Мазкур ҳолатларни инобатга олган ҳолда, вазирдан UZIMEI платформаси ва мобил иловаларда юзага келган техник муаммоларни бартараф этиш, IMEI2 бўйича тартибни соддалаштириш ва тизимдаги мавжуд бюрократик чекловларни юмшатиш бўйича олиб борилаётган ишлар юзасидан 10 кун муддатда расмий ахборот тақдим этиш сўралган.