Ўзбекистонда янги 4 та нуфузли хорижий компаниянинг лойиҳалари ишга туширилиб, автомобилсозлик соҳасида ҳақиқий рақобат пайдо бўлади. Бу ҳақда президентликка номзод Шавкат Мирзиёев маълум қилди.
Ўзбекистон президентлигига номзод Шавкат Мирзиёевнинг таъкидлашича, республикада 4 та нуфузли хорижий компаниянинг лойиҳалари ишга туширилиб, автомобилсозлик соҳасида ҳақиқий рақобат пайдо бўлади ва ишлаб чиқариш ҳажми йиллик 1 миллион донага етказилади. Ҳозирда ушбу кўрсаткич 350 мингтани ташкил этади.
Қайд этилишича, бунда, йилига 300 мингта электромобиль ишлаб чиқарилади. Шунингдек, Тошкент – Самарқанд, Навоий – Бухоро йўналишларида қўшимча тезюрар темир йўллари қурилади ҳамда темир йўл соҳасига хусусий сектор жалб қилиниб, хизматлар сифати рақобатбардош нархлар асосида белгиланади. 2030 йилга қадар туман марказларидан ҳар бир қишлоққача – жами 5,5 минг километр цемент-бетон йўллар қурилади ва жамоат транспорти билан тўлиқ қамраб олинади.
Бундан ташқари, Тошкент – Самарқанд ва Тошкент – Фарғона водийси йўналишларида хусусий шериклик асосида янги автомобил йўллари қурилишири режалаштирилган. Шавкат Мирзиёевнинг таъкидлашича, 2024 йилдан бошлаб, янги уй-жой сотиб олган аҳолига, қўшилган қиймат солиғининг ярми қайтариб берилади.