Ижтимоий тармоқларда Тошкент шаҳри Яшнобод туманида юз берган йўл-транспорт ҳодисаси оқибатида “Cobalt” русумли автомобил ёниб кетгани акс этган видеолар тарқалди. Ҳолат юзасидан Тошкент шаҳар Фавқулодда вазиятлар бош бошқармаси расмий маълумот берди.
Қайд этилишича, ҳодиса 1 январь куни соат 01:59 да Яшнобод тумани Маҳтумқули кўчасида, 85/1-уй қаршиcида содир бўлган. Икки автомобил иштирокида йўл-транспорт ҳодисаси юз берган.
Тўқнашув натижасида “Cobalt” автомобили ёнаётгани ҳақида Фавқулодда вазиятлар бош бошқармасига хабар келиб тушган. Шундан сўнг қутқарув техникалари воқеа жойига соат 02:08 да етиб борган.
Ёнгин соат 02:14 да тўлиқ ўчирилган. Расмий маълумотларга кўра, ҳодиса оқибатида тан жароҳати олганлар аниқланмаган. Ҳолат юзасидан тегишли тартибда ўрганиш ишлари олиб борилмоқда.