Бугундан Самарқанд шаҳрида ЕТТБ Бошқарувчилар кенгашининг «Мувофиқликка сармоя киритиш» мавзусидаги 32- йиллик йиғилиши ўз ишини бошлади. Тадбирга ҳар томонлама тайёргарлик кўриш доирасида 2022 йил июнь ойидан 2023 йил март ойигача ЕТТБ ишчи гуруҳининг протокол, логистика ва бошқа йўналишлар бўйича 5 та ташрифи ташкил этилди. Йиллик учрашув ва бизнес-форум 2000 дан ортиқ юқори мартабали давлат амалдорлари, молиявий ва корпоратив раҳбарлар, фуқаролик жамияти вакиллари ва глобал оммавий ахборот воситаларини бирлаштирадиган динамик тадбирлар ва панель муҳокамаларидан иборат. Тадбир шунингдек, ЕТТБ ўтган йил давомида эришган ютуқларини кўриб чиқиш ва келажак режаларини белгилаш имкониятини беради. Бизнес форумнинг асосий мавзуси барқарорликка сармоя киритиш ҳисобланади. Тадбирнинг уч кунлик кун тартибидан турли мавзуларда экспертлар иштирокида бир қатор муҳокама сессиялари ўрин олган.
Ўзбекистоннинг ЕТТБ билан муносабатлари
Ўзбекистон 1992 йил 30 апрелда ЕТТБга аъзо бўлган. Республика ЕТТБнинг Швейцария гуруҳига киради, унга Швейцария, Украина, Лихтенштейн, Туркманистон, Сербия, Черногория ва Молдова киради. 1993 йил май ойида Тошкентда банк ваколатхонаси очилган, 2019 йил октабр ойида – Андижонда, 2021 йил июнда – Урганчда ўз иш фаолиятини йўлга қўйган. Бугунги кунга келиб, республикада ЕТТБ иштирокида лойиҳаларнинг умумийқиймати 4 млрд евродан ортиқни ташкил этади. Уларнинг сони эса 129 тага етган. Шу билан бирга, уларнинг 70 таси (2,3 млрд евродан ортиқ) 2017 йилдан буён амалга оширилди. ЕТТБ 2022 йилда лойиҳаларга 839 миллион евро ажратди, бу эса 2021 йилга нисбатан 30 фоизга кўпдир. Республика 3 йил давомида Марказий Осиёда ЕТТБ молиялаштириш бўйича етакчи бўлиб келмоқда. Банк Ўзбекистондаги фаолиятида давлат корхоналари ва банкларини ўзгартириш ва хусусийлаштириш, тўғридан-тўғри хорижий инвестицияларни жалб этиш, яшил ривожланиш лойиҳаларини, энергетика ва транспортни қўллаб-қувватлаш, давлат-хусусий шерикликнинг самарали механизмларини жорий этиш, шунингдек, аёллар ва ёшлар тадбиркорлиги дастурларини қўллаб-қувватлашда алоҳида эътибор қаратилмоқда. Хусусан, ЕТТБ иштирокида вазирлик ва идоралар томонидан «Давлат-хусусий шериклик тўғрисида»ги қонун ишлаб чиқилди. Банк Бухоро вилоятида умумий қуввати 1 ГВт бўлган иккита шамол электр станциясини қуриш учун 520 миллион доллар ажратди. ЕТТБ Саримай ва Жанкелди қишлоқлари ўртасида узунлиги 120 км бўлган юқори вольтли електр узатиш линиясини қуришда ҳам иштирок этмоқда.
ЕТТБ ҳақида нималарни биламиз?
Европа тикланиш ва тараққиёт банки халқаро молия институти ҳисобланади. 1991 йилда тузилган. Бош қароргоҳи Лондон шаҳрида жойлашган. Асосий мақсад мамлакатларга бозор иқтисодиётига ўтишга ёрдам бериш, уларни жаҳон хўжалик ҳамжамиятига интеграциялашуви, таркибий ва иқтисодий ислоҳотларни амалга ошириш, шу жумладан монополиядан чиқариш, марказсизлаштириш, давлат тасарруфидан чиқариш ва хусусийлаштириш ва хусусий тадбиркорликни ривожлантириш. ЕТТБ ташкил этилганидан бери умумий қиймати 180 миллиард евродан ортиқ бўлган 6500 дан ортиқ лойиҳаларни амалга оширди. ЕТТБнинг олий бошқарув органи – Бошқарув кенгаши бўлиб, у ўз ваколатларининг катта қисмини банк фаолиятининг стратегик йўналиши учун масъул бўлган Директорлар кенгашига топширади. Директорлар кенгашига ЕТТБ президенти бошчилик қилади. Амалдаги президент Франция фуқароси Одил Рено-Бассо бўлиб, у 2020 йил июль ойида лавозимга киришган. Банкнинг устав капитали 30 миллиард еврони ташкил этади. ЕТТБ ўз облигацияларини халқаро молия бозорларида чиқариш орқали маблағ жалб қилади. Бугунги кунга келиб, банк фаолияти Марказий ва Шарқий Европа, Марказий Осиё, МДҲ, Жанубий ва Шарқий Ўртаер денгизининг 35 та давлати ва Мўғулистонни қамраб олади.