Украина президенти Володимир Зеленский АҚШ томонидан тақдим этилган хавфсизлик кафолатлари бўйича ҳужжат 100 фоиз тайёр эканини билдирди. Унинг айтишича, Киев ҳозирча фақатгина ҳужжатни имзолаш санаси ва жойи бўйича ҳамкорлар қарорини кутмоқда. Reuters хабарига кўра, бу ҳақда Зеленский Литванинг Вилнюс шаҳрида ўтказилган матбуот анжуманида маълум қилган.
Президент таъкидлашича, ушбу келишув Украинага бериладиган хавфсизлик кафолатларида АҚШнинг роли ҳал қилувчи аҳамиятга эга. Ҳужжат имзоланганидан сўнг у ратификация учун АҚШ Конгресси ҳамда Украина парламентига киритилади.
Шунингдек, Зеленский Россия ва Украина делегациялари ўртасида Абу-Дабида АҚШ воситачилигида ўтказилган музокараларга ҳам тўхталди. Унинг сўзларига кўра, урушни якунлаш бўйича АҚШ таклиф қилган 20 банддан иборат режа муҳокама қилинган, баҳсли масалалар ҳали мавжуд бўлсада, уларнинг сони аввалгига нисбатан камайган.
Зеленский Россия ва Украина позициялари кескин фарқ қилишини қайд этиб, Москва айрим ҳудудлар масаласида босимни кучайтираётганини айтди. Шу билан бирга, Киев ўзининг ҳудудий яхлитлиги масаласида муросага тайёр эмаслигини яна бир бор тасдиқлади. Унинг таъкидлашича, АҚШ томонларни муросага олиб келишга уринмоқда ва бунинг учун барча томонлар сиёсий ирода кўрсатиши зарур.