O‘tgan yil "Issiqlik elektr stansiyalari” AJ tomonidan 54,2 mlrd. kvt. soat elektr energiyasi ishlab chiqarildi
AJ 2023 yilning asosiy ko‘rsatkichlarini eʼlon qildi.
“Issiqlik elektr stansiyalari” AJ bugun mamlakatimizda elektr energiyasi ishlab chiqaruvchi asosiy generatsiya tarmog‘i hisoblanadi. Tarmoq korxonalarining yurtimizda ishlab chiqarilayotgan elektr energiyasidagi ulushi 70 foizdan ko‘proqni tashkil etadi.
2023 yil davomida “Issiqlik elektr stansiyalari” AJ tomonidan jami 54,2 mlrd.kvt.soat elektr energiyasi ishlab chiqarildi. Bu rejaga nisbatan 1,4 mlrd.kvt.soatga ko‘p bo‘lib, qo‘yilgan vazifa 102,6 foizga bajarildi.
2023 yilda investitsiya loyihalari doirasida 622,63 mln. AQSH dollari o‘zlashtirildi, bunda belgilangan reja ijrosi 100,1 foizni tashkil etdi. Investitsiya dasturi doirasida yangi, zamonaviy, energotejamkor qurilmalarni joriy etish maqsadida, Tolimarjon IES AJda 1065 MVt quvvatga ega bug‘-gaz qurilmasini qurishga start berildi. Toshkent IEMda 2024 yilning birinchi choragida 64 MVt ga teng ikkita gaz turbinasi qurilmalari ishga tushiriladi.
Issiqlik elektr stansiyalarini 2023-2024 yillar kuz-qish mavsumiga tayyorlash maqsadida jami 53 ta energoqurilmalarda taʼmirlash ishlari amalga oshirildi. Natijada energoqurilmalarning mavjud quvvati 209 MVt hamda qozon qurilmalarining ishlab chiqarish quvvati 483 tonna/soatga oshirilishiga erishildi.
Shuningdek, poytaxtimizning Uchtepa tumanidagi “Chilonzor-5” va Shayxontohur tumanidagi “G‘arbiy-3” sonli issiqlik markazlari qozonxonalari modernizatsiya qilindi. Eʼtiborlisi, qurilmaning gibrid shaklida ishlashi anomal sovuq ob-havo sharoitida ham, zaxira yoqilg‘isini yoqish evaziga isteʼmolchilarni uzluksiz issiqlik energiyasi bilan taʼminlash imkonini beradi. Qolaversa, Chilonzor tumanining “Oqtepa” va “Bog‘zor” mahallalari hududida yangi, zamonaviy, energotejamkor kogeneratsiya qurilmasi barpo etildi. Bu yerda 4,6 MVt elektr energiyasi ishlab chiqarishga ixtisoslashgan 2 ta gaz-porshen qurilmasi hamda 25,4 Gkall issiqlik energiyasi ishlab chiqaruvchi 2 ta Bosch qozonlari o‘rnatildi. Natijada issiqlik tarmoqlaridagi yo‘qotishlar 90 foizga kamaytirilishiga, qo‘shimcha yiliga 32,0 mln. kvt soat elektr energiyasi ishlab chiqarilishiga hamda 1,0 mln. kubmetr tabiiy gazni tejash imkoniyati paydo bo‘ldi.
2023 yilda mahalliylashtirish dasturi doirasida 35 ta loyiha asosida qiymati 35 mlrd. so‘mlik mahsulot ishlab chiqarilishi rejalashtirilgan edi. Amalda ushbu ko‘rsatkich 48,1 mlrd. so‘mga yoki 137 foizga bajarildi. Qolaversa, kooperatsiya savdolari bo‘yicha 169 mlrd. so‘mlik mahsulot xarid qilish prognoz qilingan bo‘lib, amalda 180,1 mlrd. so‘mga yoki 106 foizga yetkazildi. Importni qisqartirish bo‘yicha olib borilgan chora-tadbirlarga ko‘ra 18,5 mln.dollarlik mahsulot o‘zimizda ishlab chiqarilib, belgilangan yillik reja ijrosi 107,4 foizni tashkil etdi.
Eʼtiborlisi, aksiyadorlik jamiyatida o‘z ehtiyoji uchun sarflanadigan elektr energiyasini “yashil energiya” hisobidan qoplash bo‘yicha ham tizimli ishlar olib borilyapti. Xususan, Davlatimiz rahbarining ushbu yo‘nalishdagi bir qator topshiriqlari ijrosini taʼminlash maqsadida 2023 yilda 9,6 MVt quvvatga teng quyosh fotoelektr stansiyalari ishga tushirildi. Hozirda mazkur quvvatni 15 MVtga yetkazish choralari ko‘rilyapti.
