Prezident topshirig‘i ijrosi: Yuqori To‘polangda yangi gidroenergetik imkoniyatlar o‘rganilmoqda
Hududda 80 MVt quvvatli Kishtut GESlar kaskadi loyihasi doirasida ishlar davom etmoqda.
O‘zbekiston Prezidenti Shavkat Mirziyoyevning Surxondaryo viloyatiga 2026-yil 26-fevral kuni amalga oshirgan tashrifi chog‘ida berilgan topshiriqlar ijrosini ta’minlash maqsadida O‘zbekgidroenergo AJ tomonidan hududlarning gidroenergetika salohiyatini o‘rganish bo‘yicha ishlar davom etmoqda.
Shu doirada Jamiyat boshqaruvi raisi Islom Abduraxmonov boshchiligidagi mutaxassislar guruhi vertolyot yordamida Sariosiyo tumanining tog‘li hududida joylashgan, dengiz sathidan qariyb 3000 metr balandlikdagi Yuqori To‘polang zonasida gidroenergetik salohiyatni o‘rganish ishlarini olib bordi.
Uch kun davom etgan amaliy tashrif chog‘ida hududning tabiiy-relyef sharoiti, suv oqimlari, gidrologik xususiyatlari hamda mavjud infratuzilma imkoniyatlari atroflicha tahlil qilindi.
Mutaxassislar tomonidan yangi gidroelektr stansiyalarini barpo etish imkoniyatlari hamda istiqbolli loyihalarni amalga oshirish uchun zarur shart-sharoitlar o‘rganildi.
Dastlabki tahlillar Yuqori To‘polang hududida bir qator istiqbolli gidroenergetik loyihalarni amalga oshirish imkoniyati mavjudligini ko‘rsatmoqda. Mazkur loyihalar bosqichma-bosqich hayotga tatbiq etilishi natijasida qayta tiklanuvchi energiya manbalaridan foydalanish ko‘lamini kengaytirish, ekologik toza elektr energiyasi ishlab chiqarish hajmini oshirish hamda Surxondaryo viloyatining ijtimoiy-iqtisodiy rivojiga qo‘shimcha turtki berish rejalashtirilgan.
Yuqori To‘polang daryosining gidrosalohiyatidan samarali foydalanish maqsadida umumiy quvvati 80 MVt bo‘lgan uchta gidroelektr stansiyani o‘z ichiga olgan Kishtut GESlar kaskadi loyihasi doirasida ham amaliy ishlar olib borilmoqda.
Shuningdek, hududda energetika infratuzilmasini rivojlantirish maqsadida Zarchob podstansiyasidan Kishtut GES stvorigacha bo‘lgan 17,7 kilometr uzunlikdagi 110/220 kV kuchlanishli ikki zanjirli havo elektr uzatish tarmog‘ini qurish loyihasi amalga oshirilmoqda.
Mutaxassislar tomonidan hududda topografik o‘lchov ishlari ham olib borilmoqda. Bundan tashqari, istiqbolli loyihalar hududiga olib boruvchi yo‘l qurilishini jadallashtirish, burg‘ulash-portlatish ishlarini xavfsiz va sifatli tashkil etish bo‘yicha mas’ullarga tegishli topshiriqlar berildi.
