AQSh Yaqin Sharqqa minglab qo‘shin yuborish masalasini ko‘rib chiqmoqda

 

AQSh ma’muriyati Yaqin Sharq mintaqasiga qo‘shimcha harbiy kuchlarni joylashtirish imkoniyatini ko‘rib chiqmoqda. Bu haqda Reuters agentligi manbalarga tayanib xabar berdi.

 

Ma’lumotlarga ko‘ra, rejalarda minglab amerikalik harbiylarni mintaqaga yuborish masalasi muhokama qilinmoqda.

 

Tashabbusning asosiy maqsadlari qatorida neft tankerlarining Hormuz bo‘g‘ozi orqali xavfsiz o‘tishini ta’minlash hamda Eron neft eksportining katta qismi amalga oshiriladigan Xarg oroli ustidan nazoratni ta’minlash ehtimoli ham bor.

 

Shuningdek, manbalarga ko‘ra, yuqori darajada boyitilgan uran zaxiralari ustidan nazorat o‘rnatishga qaratilgan ehtimoliy missiya ham muhokama qilinmoqda.

 

Biroq hozircha bu masala yuzasidan yakuniy qaror qabul qilinmagan. Manbalarning bildirishicha, Donald Tramp ma’muriyati barcha variantlarni ochiq holda ko‘rib chiqmoqda.

 

Shu bilan birga, AQSh ichida harbiy operatsiyani qo‘llab-quvvatlash darajasi nisbatan past ekani ta’kidlanmoqda. Bundan tashqari, Tramp saylovoldi kampaniyasi davomida Yaqin Sharqda yangi mojarolarga yo‘l qo‘ymaslik haqida va’da bergan edi. Shu sababli quruqlikdagi harbiy kuchlardan foydalanish siyosiy jihatdan sezilarli xavf tug‘dirishi mumkin.