Unda Panjsher qarshilik kuchlari yetakchisi mavjud vaziyatga to‘xtalib o‘tdi. Masʼudning fikricha, afg‘on jamiyatining bir qisminigina o‘z ichiga olgan hukumat oxir-oqibat halok bo‘ladi. Afg‘oniston tarixi bu kabi boshqaruv modelining samarasiz ekanini isbotlagan.
Ayollar masalasi haqida gapirar ekan, siyosatchi “Tolibon”ning xotin-qizlarni ko‘plab huquqlar, xususan, taʼlim olishdan mahrum qilganiga eʼtibor qaratdi. Shuningdek, harakat mamlakatni xalqaro terrorizm o‘chog‘iga aylantirdi.
“Bizning maqsadimiz — inklyuziv hukumat. U ayollar huquqini hurmat qiladi va dunyoning barcha davlatlari bilan yaxshi aloqada bo‘ladi”, — degan Masʼud.
Shuningdek, qarshilik kuchlari rahbari Afg‘oniston uchun markazlashtirilmagan boshqaruv eng mukammal variant ekanini taʼkidladi. Uning fikricha, mahalliy aholi o‘z rahbarlarini saylash imkoniga ega bo‘lishi lozim.
Eslatib o‘tamiz, avvalroq toliblar mahalliy imomlarni qiynoqqa solayotgani haqida xabar berilgandi.
Jahongir Qo'ziyev