Муфтийнинг сўзларига кўра, “Толибон” жангарилари ҳатто Афғонистон уламолари раисини ҳам қамоққа олган. У маълум муддатдан сўнг қўйиб юборилган. Шундай бўлса-да, бундай ҳолатларнинг содир бўлиши хавотирли.
“Толибларнинг уламоларга энг асосий даъвоси — биз уларни олдинги ҳукумат билан курашиб, қўллаб-қувватламадик. Эндиликда кўплаб имомлар қочиб кетган”, — дейди Абдулқодир.
Унинг ўзи ҳам яшириниб юрганини айтган: ҳозирда муфтий ва оиласи бошқа-бошқа вилоятда истиқомат қилмоқда.
Шунингдек, у Афғонистонда Ислом дини билан вазият юзасидан хавотир билдирди: толиблар ҳокимиятни эгаллагач, турли экстремистик гуруҳлар фаоллашди.
“Бундай шароитда дин террорчилар қўлида ўйинчоққа айланади. Ундан уруш ва қотиликка баҳона сифатида фойдаланишади”, — деган муфтий.
АҚШ ва Ғарб қўшинлари олиб чиқилиши ортидан Афғонистонда “Толибон” ҳаракати фаоллашди.15 август куни улар Кобулни жангсиз эгаллаб, марказий ҳокимиятни қўлга киритди.
Эслатиб ўтамиз, аввалроқ Покистон Афғонистондаги янги ҳукуматга ёрдам беришга чақирганди.
Жаҳонгир Қўзиев