Андижон ва Фарғона МИБ раҳбарлари ўзгарди
Аюбхон Алимов Андижон вилояти, Отабек Салмонов эса Фарғона вилояти МИБ бошқармаси бошлиғи бўлди.
Мажбурий ижро бюросининг Андижон ва Фарғона вилоятлари бошқармаларига янги раҳбарлар тайинланди. Бу ҳақида МИБ ахборот хизмати хабар берди.
Маълум қилинишича, бош прокурор буйруғи билан Отабек Салмонов Бош прокуратура ҳузуридаги Мажбурий ижро бюросининг Фарғона вилоят бошқармаси бошлиғи лавозимига тайинланди.
Салмонов 1982 йил Фарғона вилоятида туғилган. Иш фаолиятини 2009 йилда Суд ижрочилари Фарғона вилояти Марғилон шаҳар бўлими суд ижрочиси вазифасидан бошлаган. 2014—2022 йилларда Суд департаменти Наманган вилояти ҳудудий бошқармаси ҳамда МИБ Фарғона вилоят бошқармаси бошлиғи биринчи ўринбосари лавозимларида ишлаган.
2022 йилнинг март ойидан буён бюронинг Андижон вилоят бошқармаси бошлиғи лавозимида фаолият юритиб келаётган эди.
Худди шунингдек, бош прокурор буйруғи билан Аюбхон Алимович Алимов МИБ Андижон вилоят бошқармаси бошлиғи лавозимига тайинланди.
Аюбхон Алимов 1981 йил Фарғона вилоятида туғилган. У иш фаолиятини 2007 йилда Суд ижрочилари Фарғона вилояти Бағдод туман бўлими суд ижрочиси вазифасидан бошлаган.
2018 йилдан бюро органларида бир қатор масъул лавозимларида ишлаб келган. 2021 йилда Данғара туман, кейинчалик Қўқон шаҳар бўлимлари бошлиғи сифатида хизмат қилган.
Тайинловга қадар бюронинг Фарғона вилоят бошқармаси бошлиғи лавозимида фаолият юритган.
