Таълим муассасалари ходимларига янги устамалар: иш стажига қараб 120 фоизгача тўланади
Ижтимоий ҳимоя миллий агентлиги тизимидаги айрим таълим муассасалари бош ҳисобчилари ва кадрлар бўйича инспекторларига меҳнат стажига қараб ойлик устама тўланади.

Ижтимоий ҳимоя миллий агентлиги тизимидаги айрим таълим муассасалари бош ҳисобчилари ва кадрлар бўйича инспекторларига кўп йиллик меҳнат стажи учун ойлик устамалар белгиланди. Тегишли ҳужжат Адлия вазирлигида 2026 йил 16 ноябрь куни 3975-рақам билан давлат рўйхатидан ўтказилди.
Ҳужжатга кўра, устамалар реабилитация марказига эга кўп тармоқли давлат ихтисослаштирилган мактабгача таълим ташкилотлари, ихтисослаштирилган ва қўшма турдаги мактабгача таълим ташкилотлари, экспериментал мактабгача таълим ташкилотлари ҳамда ихтисослаштирилган мактаблар ходимларига татбиқ этилади.
Шунингдек, кўп функционал инклюзив-ресурс мактаблар, кўп тармоқли мактаб ва мактаб-интернатлар, ихтисослаштирилган мактаб-интернатлар, махсус техникумлар ҳамда кўп функционал инклюзив-ресурс марказлари ходимлари ҳам ушбу тартибга киради.
Устамалар мазкур муассасаларнинг бош ҳисобчилари, етакчи ҳисобчилари, ҳисобчилари ва кадрлар бўйича инспекторларига лавозим маошига нисбатан қуйидаги миқдорларда тўланади:
- 1 йилдан 3 йилгача иш стажи учун — 30 фоиз;
- 3 йилдан 5 йилгача — 60 фоиз;
- 5 йилдан 10 йилгача — 80 фоиз;
- 10 йилдан 15 йилгача — 100 фоиз;
- 15 йил ва ундан ортиқ — 120 фоиз.
Шу тариқа, мазкур лавозимларда камида 15 йил иш стажига эга ходимларга лавозим маошининг 120 фоизи миқдорида ойлик устама тўланиши белгиланган.








