Bugun, 5 sentyabr kuni Andijon viloyatining Andijon tumanida joylashgan gaz quyish shoxobchasida yong‘in sodir bo‘ldi. Viloyat Favqulodda vaziyatlar boshqarmasining ma’lum qilishicha, taxminan 5 tonnalik MAN rusumli yoqilg‘i tashuvchi avtomobildan propan suyultirilgan gazni to‘kish jarayonida texnologik qoidalar buzilib, yong‘in kelib chiqqan. Hodisa haqida soat 12:05 da xabar berilgan.
Yong‘in-qutqaruv bo‘linmalari voqea joyiga 12:13 da yetib borgan va olov soat 12:26 da o‘rab olingan. Yong‘in 13:03 da to‘liq bartaraf etilgan. Rasmiy ma’lumotlarga ko‘ra, hodisa oqibatida jabrlanganlar qayd etilmagan.
So‘nggi oylarda mamlakatning turli hududlarida shunga o‘xshash holatlar qayd etilmoqda. Jumladan, Surxondaryo va Samarqand viloyatlarida gaz quyish shoxobchalarida portlash va yong‘inlar sodir bo‘lgan.
Iyul oyida esa, Qashqadaryo viloyatining Ko‘kdala tumanidagi portlash oqibatida to‘rt kishi vafot etgan edi.