Daniya 2026-yildan boshlab ayollar uchun ham majburiy harbiy xizmatni joriy qiladi. Bu haqda mamlakat mudofaa vaziri Troels Lund Poulsen ma’lum qildi.
Yangi tartibga ko‘ra, 2025-yil 1-iyuldan keyin 18 yoshga to‘ladigan daniyaliklar harbiy xizmatga chaqirilishi mumkin. Avval majburiy harbiy xizmat faqat erkaklar uchun edi, biroq amalda aksariyat chaqiriluvchilar xizmatga ko‘ngilli ravishda borardi.
Shuningdek, 2026-yil avgustidan boshlab Daniyada harbiy xizmat muddati to‘rt oydan o‘n bir oygacha uzaytiriladi.
Shu tariqa, Daniya Yevropa Ittifoqida ayollar uchun majburiy harbiy xizmatni joriy qilgan ikkinchi davlatga aylanadi. Shvetsiyada bunday tizim 2017-yildan beri amal qiladi. NATOga a’zo bo‘lib, biroq Yevropa Ittifoqiga kirmagan Norvegiyada ham ayollar harbiy xizmatni o‘tashlari shart.
