Avstraliya bosh vaziri Skott Morrison nima uchun Fransiya bilan suvosti kemalari shartnomasi bekor qilinganini maʼlum qildi. Bu haqda “TASS” xabar berdi.
Uning so‘zlariga ko‘ra, shartnoma “jiddiy muammolar”ga ega bo‘lgan. Uning bekor qilinishiga asosiy sabablardan biri loyihaning amalga oshirilishidagi ko‘plab to‘xtalishlar va o‘sib borgan xarajatlar bo‘lgan.
“Ushbu shartnoma asosida ishlab chiqarilgan suvosti kemasi faqat 2038 yilga borib dengizga tushgan bo‘lardi. Yaʼni u suvga tushishi bilan eskirgan bo‘lar edi”, – degan Morrison.
Bosh vazirning qo‘shimcha qilishicha, Avstraliya har doim atom suvosti kemalariga ega bo‘lishni xohlagan. U, shuningdek, boshqa davlatlardan shu turdagi texnikani sotib olishni sentyabrda emas, balki 18 oy oldin o‘ylaganini taʼkidladi.
Maʼlumot o‘rnida: 2021 yil sentyabrda Avstraliya Fransiya bilan 66 milliard dollarlik suvosti kemalarini yetkazib berish bo‘yicha shartnomani bekor qildi. Bunga AQSHning Kanberraga atom suvosti kemalarini yetkazib berishga kelishib olgani sabab bo‘ldi.
Bundan avval Yevropa Ittifoqi Avstraliya bilan erkin savdo to‘g‘risidagi muzokaralarni kechiktirgani hamda Fransiya YEIning Avstraliya bilan erkin savdo to‘g‘risidagi taklifiga qarshi chiqqani xabar qilingandi.
Jahongir Qo'ziyev